జయభేరి, మేడిపల్లి :చెంగిచర్ల నుంచి చర్లపల్లి వెళ్లే ప్రధాన రహదారి భారీ గుంతలతో అధ్వానంగా మారింది. ఈ మార్గంలో ప్రతిరోజూ ఆర్టీసీ బస్సులు, ద్విచక్ర వాహనాలు, కార్లు, ఇతర వాహనాలు పెద్ద సంఖ్యలో రాకపోకలు సాగిస్తుండటంతో గుంతల కారణంగా వాహనదారులు తీవ్ర ఇబ్బందులు ఎదుర్కొంటున్నారు.
ముఖ్యంగా చెంగిచెర్ల ఆర్టీసీ డిపోకు వెళ్లే మార్గం గుంతలతో నిండిపోవడంతో బస్సులు నడిపే డ్రైవర్లు తీవ్ర ఇబ్బందులు పడుతున్నారు. వర్షం కురిసిన సమయంలో గుంతల్లో నీరు నిలిచిపోవడంతో వాటి లోతు కనిపించక ప్రమాదాల ముప్పు మరింత పెరుగుతోంది. ఈ సందర్భంగా ఆర్టీసీ డ్రైవర్ రఘుపాల్ రెడ్డి మాట్లాడుతూ, ప్రతిరోజూ ఈ రహదారిపై బస్సులు నడపాల్సి వస్తోందని, భారీ గుంతల కారణంగా బస్సులను జాగ్రత్తగా నడపాల్సి వస్తుందని తెలిపారు. గుంతల వల్ల బస్సులకు కూడా ఇబ్బందులు ఏర్పడుతున్నాయని, ప్రయాణికుల భద్రత దృష్ట్యా అధికారులు వెంటనే స్పందించాల్సిన అవసరం ఉందన్నారు.
“ప్రస్తుతం శాశ్వత రహదారి పనులు చేపట్టడానికి సమయం పట్టినా, కనీసం గుంతలపై అత్యవసరంగా ప్యాచ్వర్క్ అయినా చేపట్టాలి. అధికారులు వెంటనే స్పందించి రోడ్డును ప్రయాణానికి అనుకూలంగా మార్చాలి” అని రఘుపాల్ రెడ్డి కోరారు. రహదారి మరమ్మతులు చేపట్టకపోతే మరిన్ని ప్రమాదాలు జరిగే అవకాశం ఉందని స్థానికులు, ఆర్టీసీ సిబ్బంది ఆందోళన వ్యక్తం చేస్తున్నారు. ప్రజలు, ప్రయాణికులు, ఆర్టీసీ సిబ్బంది ఇబ్బందులను దృష్టిలో ఉంచుకుని సంబంధిత అధికారులు తక్షణమే స్పందించి గుంతలను పూడ్చి ప్యాచ్వర్క్ చేపట్టాలని వారు కోరుతున్నారు.
