జయభేరి, మేడ్చల్:
ప్రభుత్వ అనుమతులు లేకుండా నిభందనలకు విరుద్ధంగా ఏర్పాటు చేసిన అక్రమ వెంచర్ పై మున్సిపల్ అధికారులు వ్యవహరిస్తున్న తీరు లోగుట్టు పెరుమాళ్ళకెరుక అనే చందంగా ఉందని పలువురు ఆరోపిస్తున్నారు.

నిబంధనలు గాలికి
ప్రభుత్వ నిబంధనలు గాలికి వదిలేస్తున్న రియల్‌ ఎస్టేట్‌ వ్యాపారులు ఇష్టారీతిన వెంచర్లు ఏర్పాటు చేస్తున్నారు. వెంచర్లు ఏర్పాటు చేసే స్థలంలో యజమానులు 30 ఫీట్ల వెడల్లు రోడ్లను నిర్మించాలి. రోడ్ల చివర్లో అండర్‌గ్రౌండ్‌ డ్రెయినేజీలను నిర్మించాలి. కరెంటు స్తంభాలు ఏర్పాటు చేసి విద్యుత్‌ కనెక్షన్లు, తాగునీటి సౌకర్యం కల్పించాలి. ప్లాట్లు కొనుగోలు చేసి ఇళ్లు నిర్మించుకునే ప్రజలకు ఆహ్లాదం కోసం మున్సిపాలిటీ నిబంధనల మేరకు పార్కులను ఏర్పాటు చేయాలి. అందుకు సొంత ఖర్చులతో మొక్కలు నాటి అభివృద్ధి చేయాలి.

దీని కోసం స్థానిక సంస్థలకు  10శాతం స్థలం వెంచర్‌ యజమానులు అప్పగించాలి. దీన్ని మున్సిపాటిటీలు పేర రిజిస్ట్రేషన్‌ చేయించాలి. ఈ ఏర్పాట్లు అన్ని చేశాక లే అవుట్‌ అనుమతులకు దరఖాస్తు చేయాలి. అధికారులు నిబంధనల మేరకు అభివృద్ధి జరిగిన పక్షంలో లే అవుట్‌ అనుమతులు మంజూరు చేస్తారు. అప్పుడు నిర్ణీత ఫీజును ప్రభుత్వానికి చెల్లించాలి.  ప్రస్తుతం ఏర్పాటవుతున్న వెంచర్లలో ఎక్కడ కూడా పై నిబంధనలు అమలు కావడం లేదు. దీంతో ప్రభుత్వ ఆదాయానికి గండి పడుతోంది.   అధికారులు, పాలకులు నిబంధనలను గాలికి వదిలి రియల్‌ వ్యాపారులతో కుమ్మక్కయ్యారని, అందుకే వెంచర్ల జోలి కి పోవడంలేదని జోరుగా ప్రచారం జరుగుతోంది.  పలు అక్రమ వెంచర్లలో అమాయకులకు అడ్డగోలు ధరలకు ప్లాట్లను విక్రయించి వ్యాపారులు సొమ్ము చేసుకుంటున్నారు.

వ్యాపారులకు ఆదాయం... మున్సిపాలిటీకి ఖర్చులు
మైసమ్మగూడలో అక్రమ లే అవుట్ల కారణంగా రియల్ వ్యాపారులకు రూ. కోట్ల ఆదాయం వస్తుండగా మున్సిపల్ కార్యాలయా ఆదాయానికి గండి పడటమే కాకుండా ఖర్చులు అవుతున్నాయి. వ్యాపారులు పంటపోలాలను ప్లాట్లుగా మార్చే సమయంలో కనీస వసతులైన డ్రైనేజీ, రోడ్లు, ఇతర వసతులు కల్పించకుండానే అమ్మకాలు జరిపి చేతులు దులుపుకోగా వాటిని కోనుగోలు చేసిన వారు సైతం అక్రమ నిర్మాణాలు చేపడుతున్నారు.

దీంతో ఆ భవనంలో హాస్టల్ మొదలైన తర్వాత వాటిలో ఉండే విద్యార్థులకు నీటి వసతి, డ్రైనేజీ, రోడ్ల సమస్య తలెత్తుతుంది. అక్రమ లే అవుట్లలో ఆదిలోనే ఆపాల్సిన అధికారులు వాటి వైపు కన్నేత్తి చూడకపోవడం, అక్రమ నిర్మాణాలకు పోత్రహిస్తుండడంతో అనంతరం సమస్యలు వచ్చినప్పుడు మున్సిపల్ కార్యాలయమే సమస్యల పరిష్కారానికి నిధులు వెచ్చించాల్సి వస్తుంది.మున్సిపల్ ఆదాయానికి గండి కొడుతూ నిబంధనలకు విరుద్ధంగా అక్రమ లే అవుట్లు చేపడుతున్న వారిని అధికారులు నిలువరించకపోవడంతో పాటు భవిష్యత్లో ఆ లేఅవుట్ లకు మున్సిపల్ వ్యయం వెచ్చించాల్సి వస్తున్నా అధికారులు ఎందుకు చూసి చూడనట్లు వ్యవహరిస్తున్నారంటూ మున్సిపల్ ప్రజలు ఆగ్రహం వ్యక్తం చేస్తున్నారు.