రైతుల సమస్యలపై పోరాడుతున్న బీజేపీ బీఆర్ఎస్ను రాష్ట్ర రవాణా బీసీ సంక్షేమ శాఖ మంత్రి పొన్నం ప్రభాకర్ తప్పుబట్టారు. బీఆర్ఎస్ అధినేత కేసీఆర్, బీజేపీ ఎంపీ బండి సంజయ్ తీరుపై పొన్నం మండిపడ్డారు. తెలంగాణలో లోక్సభ ఎన్నికల నేపథ్యంలో అధికార, విపక్షాల మధ్య మాటల యుద్ధం నడుస్తోంది. కరువు పరిస్థితులపై కేసీఆర్ వ్యాఖ్యలపై మంత్రి పొన్నం ఆగ్రహం వ్యక్తం చేశారు. ఇది కాంగ్రెస్ తెచ్చిన కరువు కాదని, ప్రకృతి వైపరీత్యాల వల్ల వచ్చిన కరువు అని పొన్నం స్పష్టం చేశారు.
బీఆర్ఎస్, బీజేపీ చేస్తున్న దుష్ప్రచారాన్ని పొన్నం కొట్టిపారేశారు. ఉమ్మడి కరీంనగర్ జిల్లా హుస్నాబాద్ నియోజకవర్గంలో పర్యటించిన మంత్రి పొన్నం ప్రభాకర్ కోహెడలో మీడియాతో మాట్లాడిన మంత్రి పొన్నం కేసీఆర్ పొలంబట, బండి సంజయ్ రైతు దీక్షల రాజకీయ డ్రామాలను విమర్శించారు. రాష్ట్రంలో కాంగ్రెస్ అధికారంలోకి వచ్చిన 100 రోజుల్లోనే 200 మంది రైతులు చనిపోయారని, కాంగ్రెస్ వల్లే కరువు పరిస్థితులు వచ్చాయని కేసీఆర్ ఆరోపించడం అర్థరహితమన్నారు. కరువు పరిస్థితులకు రాజకీయాలకు సంబంధం ఏంటని ప్రశ్నించారు. అసెంబ్లీ ఎన్నికలు ముగిసిన నాలుగు నెలల తర్వాత బయటకు వచ్చిన కేసీఆర్ సాగు, తాగు నీటి విషయంలో రాజకీయం చేయాలని చూస్తున్నారని మండిపడ్డారు. గతేడాది ఆగస్టు నెలలో వర్షాభావ పరిస్థితులు వచ్చాయని, ఆ రోజున బీఆర్ఎస్ ప్రభుత్వం అధికారంలో ఉందని గుర్తు చేశారు. ఎల్ నినో వల్ల ఏర్పడిన పరిస్థితుల దృష్ట్యా రాష్ట్రంలోని రిజర్వాయర్లలోని నీటిని సాగు, తాగునీటి అవసరాలకు ఎలా వినియోగించుకోవాలనే అంశంపై అధికారులతో సమన్వయం చేస్తున్నామని తెలిపారు.నిధుల కోసం కేసీఆర్ను కలిసి రావాలి
తెలంగాణలో కరువు పరిస్థితులను పారద్రోలేందుకు కేంద్రం నుంచి కావాల్సిన నిధులు రాబట్టేందుకు కేసీఆర్ ను కలిసి రావాలని పొన్నం డిమాండ్ చేశారు. వర్షాభావ పరిస్థితుల నేపథ్యంలో సాగు, తాగునీటికి ఇబ్బంది ఉందని, ఇలాంటి పరిస్థితుల్లో అవసరమైన నిధులు కేటాయించి రాష్ట్రాన్ని ఆదుకోవాలని కేంద్రాన్ని కోరుతున్నామన్నారు. కేంద్రంతో సత్సంబంధాలు నెలకొల్పి రాష్ట్రానికి మరిన్ని నిధులు తీసుకురావడమే తమ ఉద్దేశమన్నారు. తెలంగాణ బిడ్డగా రాష్ట్ర ఏర్పాటు కోసం పోరాడాలని భావిస్తున్న కేసీఆర్ రాష్ట్రానికి కావాల్సిన నిధుల కోసం కాంగ్రెస్ తో పాటు బీజేపీతో కలసి పోరాడాల్సిన అవసరం ఉందన్నారు. రాష్ట్రంలో నెలకొన్న పరిస్థితులపై రాజకీయాలు చేయకుండా ఢిల్లీకి వెళ్లి కరువు పరిస్థితులను కేంద్రం దృష్టికి తీసుకెళ్లి అవసరమైన నిధులు అడగాల్సిన బాధ్యత మాజీ ముఖ్యమంత్రిపై ఉందన్నారు.
బండి రైతు పేరుతో పొలిటికల్ డ్రామా
లోక్సభ ఎన్నికల నేపథ్యంలో బీజేపీ జాతీయ ప్రధాన కార్యదర్శి కరీంనగర్ ఎంపీ బండి సంజయ్ రైతుల పేరుతో రాజకీయ డ్రామా సృష్టిస్తున్నారని పొన్నం ప్రభాకర్ ఆరోపించారు. వరి ధాన్యం ఇంకా కళ్లకు రాలేదని, సంజయ్ మాత్రం కళ్ల వద్దే ఉంటారని చెప్పడం విడ్డూరంగా ఉందన్నారు. పొలాల్లో ధాన్యం ఉండి రైతులు ఇబ్బందులు పడుతుంటే సంజయ్ ఎందుకు కనిపించడం లేదని ప్రశ్నించారు. బండి సంజయ్ కుమార్ కు చిత్తశుద్ధి ఉంటే తెలంగాణలో నెలకొన్న పరిస్థితుల దృష్ట్యా కేంద్ర ప్రభుత్వంపై ఒత్తిడి తెచ్చి రాష్ట్రానికి మరిన్ని నిధులు విడుదల చేసేలా పోరాడాలని సూచించారు. ప్రకృతి వైపరీత్యాల కారణంగా పంట నష్టపోయిన రైతులకు కేంద్రం సంజయ్ ఎకరాకు ఎంత నష్టపరిహారం ఇస్తుందో, అంతే మొత్తంలో రాష్ట్రం కూడా ఇస్తుందని స్పష్టం చేశారు. గల్లీలో రైతుదీక్ష పేరుతో రాజకీయం చేయకుండా ఢిల్లీలో పోరాడేందుకు నిధులు తీసుకురావాలని డిమాండ్ చేశారు.
ప్రజల ఆకాంక్షల మేరకే కాంగ్రెస్ ప్రభుత్వం నడుస్తోంది
రాష్ట్ర ప్రజలు మార్పు కోరుకుంటున్నారని, వారి ఆకాంక్షలకు అనుగుణంగానే రాష్ట్రంలో కాంగ్రెస్ ప్రభుత్వం ఏర్పడిందని మంత్రి పొన్నం ప్రభాకర్ అన్నారు. రాష్ట్ర శాసనసభ సమావేశాల్లో గత ప్రభుత్వ అనాలోచిత నిర్ణయాలు, ఆర్థిక క్రమశిక్షణ లేక సంక్షోభంపై శ్వేతపత్రం విడుదల చేశారని గుర్తు చేశారు. గత ప్రభుత్వం రాష్ట్రాన్ని ఆర్థికంగా అప్పుల కుప్పగా మార్చినప్పటికీ ఎన్నికల ముందు ఇచ్చిన హామీలను చిత్తశుద్ధితో అమలు చేస్తున్నామన్నారు. రైతుల సంక్షేమమే ధ్యేయంగా కాంగ్రెస్ ప్రభుత్వం పనిచేస్తోందని స్పష్టం చేశారు.
